كل يـوم تعال

تشهد مدينتي الدمام والخبر على الساحل الشرقي من المملكة العربية السعودية

تطورات سريعة ونقلة هائلة في الطرق وغيرها …

مما جعل المدينتين اشبه بالعروسين الذان يستعدان لإتمام حفل زفافهما …

في الأيام القليلة القادمة سيشرفها خادم الحرمين الشرفين الملك عبدالله بن عبدالعزيز حفظه الله

يرافقه كبار المسئولين بالدولة ودول أخرى ومن ضمنهم معالي مدير الولايات المتحدة الأمريكية فضيلة الشيخ جورج بوش

أخذ الله سياساته مع انتهاء فترته رئاسته إلى غير رجعه

الزيارة والإحتفالات التي ستقام نظراً للعلاقة الوطيدة بين الولايات المتحدة والمملكة العربية السعودية من 75 سنة

وخاصة الشراكة القوية في شركة الزيت العربية السعودية الأمريكية ( ارامكو) حيث قالي لي بعض الموظفين أنهم يعملون لـ 12 ساعة هذه الأيام

ومن هم بقسم العلاقات العامة ومعرض ارامكوا يداومون حتى يوم الجمعه ( طبعاً كل شي بحقه )

سعر البرميل وصل 124

وأنا مواطن بسيط عادي ومابعرفش

وش دخلني طاح ولا قام ولا هبط ولا سقط  ولا أنهزم…

 وماأعرف إلا أن الأسعار مرتفعه وحرارتها تقارب حرارة شمس صيفنا

الطرق الي حول حارتنا الي حطو فيها وورود وزفلتوها وزينوها

ماأدري من أي بند جابوا هالميزانية …!!

أنا مواطن بسيط عادي ومابعرفش

يعني معقولة كانت موجودة من قبل والحق العام حرام يستخدمها إلا لما يجي واحد عقله صغير مثل بوش

عفواً عزيزي القارئ بإمكانك تستبدل الكلمات كيفما شئت

لأني مواطن بسيط عادي ومابعرفش

وش لي بالكتابة وش لي بالتحليل

انا مواطن بسيط عادي ومابعرفش

إلا على الطاري

الحين هالعمال الي يشتغلون ليل نهار ( مساكين كان الله بعونهم) في حر الشمس الحارقة يمكن المويه

مايجدونها او يشترونها على حسابهم !!!

لأني مواطن بسيط عادي

ماراح اسأل وين كانوا يشتغلون من قبل …؟

 

اتوقع بوش الأصغر ( في كل شي ) راح يمر تحت النفق الي هلك تحته من هلك

وراح ضحيته مايقارب ضحايا اطفال العراق خلال يوم …!!

وهو مجرد توقع من مواطن بسيط عادي

نعم نعم بوش ورفقته راح يزور منتزه الملك فهد ويشوفو مدى الدمار الي خلفه ( حسن الصيانة الدورية) والإهتمام من إدارته ومن إمانه الدمام

لأن هذه الأمر يعني المواطنين وزوار المنطقة

لأني مواطن بسيط عادي

بوش راح يسكن في الشيراتون أو المرديان ويشوف اسعار الفنادق ويقارن بينها وبين اسعار الدول الي يزورها ..!!

والخدمة المقدمة فيها

 ( اجل خمس نجوم ) طل نجمتين وتخب عليهم

اقترح على الاخوة المنظمين للزيارة انه يشوف ويطلع على أحدث الأجهزة في مستشفى التخصصي

ويشوف كيف دقة الأداء الي يستخدمونها الأطباء ..!!

تكفون ارجوكم اتوسل إليكم ( لاتورونه إحصائية الوفيات نتيجة الأخطاء الطبية )

تراه راح يتشقق ويفرح ويقول زين في اخطاء فادحه بالعالم غير اخطائي في بغداد …؟؟

تراه مهتم بالحيل بالحيل بالصناعة والشركات

يعني ماله داعي نتفشل لما يطلع على إنتاجية شركة الأتصالات والكهرباء والخطوط الحديدية والجوية

مقارنه بالأرباح الذي لن يتوقعه خشم سعادته ,,, والتي تتجاوز نهب برميل الرافدين

ولأني مواطن بسيط عادي

اتوقع خلال مدة بقائه راح يمر على سوق الخضرا يتقضى له مايشتهي

تكفون لاتقولون له ترى الي يتشغلون ماعندهم وظايف

لأنه يدري اننا اكبر بلد مصدر للنفط ___ حرام السمعه تروح وطي في يومين

بعدين المعتقلين السعوديين عندهم والأسرى المظلومين والمضضهدين بدون وجه حق

والتأخير في أنهاء الإجراءات من فيزا وتأشيرة وقيادة مركبة وغيرها مما لايعلمها المواطن البسيط العادي الي مثلي

لاتقلون له ترى حنا نعامل الأمريكي معاملة الأمير

لأنه يدري أنهم بأمريكا يعاملون السعودي الغير أمير معاملة الحمير …!!

يمكن فخامته وده يستأجر سيارة يتمشى على الأماكن السياحيه

اول شي ماله داعي هو الي يدفع ( لأنه يمكن مايقدر على إيجار السيارة ) انا اقول نسوي قطيه ونستأجر له

بس تعالوا يووووووووه وين نوديه مكان يليق بمخه …

كل مكان خربان …

يووووووووووووه والله فشيله يدخل دورة مياه في محطه على الخط أو بالكورنيش

لأني مواطن بسيط عادي

ومستانس جداً لأن الدمام صارت شوي حلوة

اقول لك يابوش

عزيزي العميل

كل يوم تعال

——————–

للأخوة المتابعين من الزملاء

أمس كنا ندف سيارة مغرزة

ومع الغبار تعرض اخوكم فهد بن صالح الزهراني

لسقوط من أثر الربو

فتحمدوا على السلامة

ودعوا لهديل أن تقوم بالسلامة

ولجميع مرضى المسلمين

ترى بعض المقاولين و… يمكن يكونوا مرضى …!!